Guarani Ñe’ẽ Rerekuapavẽ (GÑR) oñemoingo ypy Léi 4.251/10, “Ñe’ẽnguéra reheguáva” rupive, oñemoĩva’ekue ary 2010-pe, jasypakõi 29 jave. Umi 15 Terekuára tenondetegua oñemoĩ hag̃ua, Paraguái Ñe’ẽnguéra Sãmbyhyha (PÑS) ohenoiva’ekue mayma tapicha ikatupyrýva ñe’ẽ jekuaápe, taha’e guarani ñe’ẽ ñemyesakãme, ñe’ẽ ñembojeguápe térã ñeporombo’épe, upéicha he’i rupi ojejapova’erãha upe léi iñakytã 44-pe. Ojeporavopávo umívape, Paraguái Ñe’ẽnguéra Sãmbyhyha, omoingo ñepyrũ Guarani Ñe’ẽ Rerekuapavẽ, aty añete rupive, jasypa 12 jave, ary 2012-me. Upe rire, jasypateĩ 08 ramo, ary 2012-me avei, Paraguái Retã Ruvichavete, karai Luis Federico Franco Gómez, ha Paraguái Ñe’ẽnguéra Sãmbyhyha, karai Carlos Alberto Villagra Marsal, oñondive, ohenói umi Terekuára ypykuépe aty añeterã Soláno Lópe Rogavusúpe, ha upe kotyguasu hérava “Libertad” pe omoĩ ipyti’a rehe kuéra mbo’y jeguaka ha ome’ẽ ichupekuéra kuatia añete oikuaaukáva ha’eha Guarani ñe’ẽ rerekua. Upéramo oñemoĩ Terekuára ramo ko’ã tapichápe: Feliciano Acosta Alcaraz, Domingo Adolfo Aguilera Jiménez, Mario Rubén Álvarez Benítez, Almidio Milciades Aquino Arguello, Rubén Bareiro Saguier, David Abdón Galeano Olivera, María Georgina González Morán, María Eva Mansfeld de Agũero, María Elvira Martínez de Campos, Julia Irene Segovia Silva de Borba, Ramón Raimundo Silva Fernández, Lino Trinidad Sanabria, Miguel Ángel Verón Gómez, Sara Delicia Villagra-Batoux ha Tadeo Zarratea Dávalos. Ha upéicha, Léi Ñe’ẽnguéra reheguáva ombohape rupi iñakytã 43 ha 44-pe, ha avei pe Apoukapy papaha 80/12 oguenohẽva’ekue Paraguái Ñe’ẽnguéra Sãmbyhyha iñakytã 2 ha rupive, upe Terekuára aty opyta Amandajépe, ikatu kuaa hag̃uaicha ojapo Guarani Ñe’ẽ Rerekuapavẽ rekoguatarã. Opaite umíva rehe ha oñembopokatu rupi chupekuéra iñepyrũete guive, ko’ã Terekuára ypykue oñohendupa porã rire Amandajépe, péina oipyaha Guarani Ñe’ẽ Rerekuapavẽ rekoguataha.
Guarani Ñe'ẽ Rerekuapavẽ